لاہور : وزیراعلیٰ پنجاب مریم نواز شریف نے عوامی جمہوریہ چین کے 76ویں یومِ قومی پر چینی قیادت اور عوام کو مبارکباد دی ہے۔ انہوں نے صدر شی جن پنگ اور ان کے رفقا کے لیے نیک تمناؤں کا اظہار کیا۔
وزیراعلیٰ نے کہا کہ پنجاب کے عوام برادر ملک چین کی خوشیوں میں شریک ہیں۔ پاکستان اور چین مثالی ہمسائے، سچے دوست اور قابلِ اعتماد شراکت دار ہیں۔ پاک چین دوستی حکومت سے لے کر عوام تک ایک ناقابل تردید حقیقت ہے۔
مریم نواز شریف نے کہا کہ چینی تعاون سے پاکستانی معیشت کے استحکام میں مدد مل رہی ہے، اور چین نے عالمی سطح پر انسانی ترقی میں مثبت کردار ادا کیا ہے۔ انہوں نے بتایا کہ حالیہ دورہ چین کے دوران پنجاب میں کینسر کے علاج کے لیے جدید کو-ابلیشن مشین لائی گئی ہے، جس سے مریضوں کو جلد صحت یابی میں مدد ملے گی۔