لاہور: وزیر ہاؤسنگ اینڈ اربن ڈویلپمنٹ پنجاب بلال یاسین کی زیر صدارت بلاسود قرضوں کی فراہمی کے حوالے سے اجلاس ہوا، جس میں اپنی چھت اپنا گھر پروگرام کے انتظامی امور اور قرضوں کی اقساط کی فراہمی کا جائزہ لیا گیا۔ سیکرٹری ہاؤسنگ نورالامین مینگل اور ڈی جی پھاٹا سکندر ذیشان نے پروگرام سے متعلق بریفنگ دی۔

 اجلاس میں بلال یاسین نے ہدایت کی کہ اپنی چھت اپنا گھر پروگرام کے تحت قرض کی اقساط کی فراہمی میں غیر ضروری تاخیر ختم کی جائے۔ انہوں نے کہا کہ درخواستوں کی جانچ پڑتال میں رکاوٹیں دور کی جائیں اور پہلی قسط کے بعد مقررہ مدت میں دوسری قسط کی ادائیگی یقینی بنائی جائے۔

 وزیر ہاؤسنگ نے کہا کہ پروگرام میں درخواستوں اور قرض کی اقساط کی ہفتہ وار بنیادوں پر مانیٹرنگ کی جائے گی۔ ان کے مطابق اب تک 2 لاکھ سے زائد مستحق خاندانوں میں 264 ارب روپے سے زائد رقم تقسیم کی جا چکی ہے۔

 بلال یاسین نے بینک آف پنجاب، اخوت، این آر ایس پی اور دیگر متعلقہ اداروں کو اقساط کی بروقت ادائیگی کے لیے مؤثر کردار ادا کرنے کی ہدایت کی۔ انہوں نے کہا کہ اپنی چھت اپنا گھر پروگرام میں شفافیت اور میرٹ پر کوئی سمجھوتہ نہیں کیا جائے گا۔

 وزیر ہاؤسنگ نے ہدایت کی کہ پروگرام سے مستفید ہونے والے خاندانوں سے براہ راست فون پر فیڈ بیک حاصل کیا جائے اور عوامی رائے کی روشنی میں پروگرام کے انتظامی نظام کو مزید بہتر بنایا جائے۔

 بلال یاسین نے کہا کہ ہر گھر کی تعمیر ایک خاندان کے بہتر مستقبل کی بنیاد ہے۔ وزیراعلیٰ پنجاب مریم نواز شریف کی ترجیح عوام کے بنیادی مسائل کا حل ہے۔

لاہور: وزیر تعلیم پنجاب رانا سکندر حیات ہفتہ وار کلاس لینے گورنمنٹ ہائی سکول لدھر پہنچ گئے، جہاں انہوں نے پانچویں جماعت کو انگلش کا مضمون پڑھایا۔ کلاس لینے سے قبل وزیر تعلیم نے ٹیچر گاؤن بھی پہنا۔

 رانا سکندر حیات نے آئندہ ہفتے پانچویں جماعت کو کمپیوٹر بطور اضافی مضمون پڑھانے کا عندیہ دیتے ہوئے کہا کہ کمپیوٹر پانچویں جماعت کے سلیبس کا حصہ نہیں، تاہم بچوں کو ابتدائی عمر سے ہی کمپیوٹر کی تعلیم دینا ضروری ہے۔

 وزیر تعلیم نے سکول میں گزشتہ ہفتے سہولیات کی فراہمی سے متعلق دی گئی ہدایات پر عملدرآمد کا جائزہ بھی لیا۔ انہوں نے سکول کو فراہم کی جانے والی سپورٹس کٹس کی رونمائی کی اور طالبات کے ساتھ بیڈمنٹن اور کرکٹ بھی کھیلی۔

 رانا سکندر حیات نے سکول میں باقاعدہ سپورٹس پیریڈ شروع کرنے کی ہدایت کی۔ میٹرک کی طالبات کی فرمائش پر وزیر تعلیم نے ان کی کلاس میں بھی لیکچر دیا۔

 وزیر تعلیم نے بتایا کہ وزیراعلیٰ پنجاب نے گورنمنٹ ہائی سکول لدھر کے لیے سٹیم لیب اور اضافی کلاس روم کی منظوری دے دی ہے، جن پر جلد کام شروع کر دیا جائے گا۔

 رانا سکندر حیات نے سکول کی تمام 1100 طالبات میں اپنی ذاتی جیب سے چپس اور جوس بھی تقسیم کیے۔

لاہور: گورنر پنجاب سردار سلیم حیدر خان نے کہا ہے کہ پیپلز پارٹی عوام کی نمائندہ وفاقی جماعت ہے اور چیئرمین بلاول بھٹو زرداری کی قیادت میں عوام کے مسائل حل کریں گے۔

 تقریب سے خطاب کرتے ہوئے گورنر پنجاب نے کہا کہ جمہوریت کے لیے سب سے زیادہ قربانیاں پیپلز پارٹی کے قائدین اور کارکنوں نے دی ہیں۔ پیپلز پارٹی جب بھی اقتدار میں آئی، روزگار کے مواقع فراہم کیے۔

 سردار سلیم حیدر خان نے کارکنوں پر زور دیا کہ وہ متحد اور منظم ہو کر چیئرمین بلاول بھٹو زرداری کا پیغام گھر گھر پہنچائیں۔ انہوں نے کہا کہ پارٹی کارکن عوام سے رابطہ مزید مضبوط کریں اور عوامی مسائل کے حل کے لیے اپنا کردار ادا کریں۔

لاہور: کم سن بچوں کے لیے قائم ڈے کیئر سینٹرز کو قانونی دائرے میں لانے کے لیے قانون سازی کا فیصلہ کر لیا گیا۔ سیکرٹری ویمن ڈویلپمنٹ ثمن رائے نے قائمہ کمیٹی ویمن ڈویلپمنٹ کو ایکٹ کا مسودہ جلد تیار کرنے کی یقین دہانی کرا دی۔

 قائمہ کمیٹی کے اجلاس میں حکومتی چیف وہپ رانا ارشد نے استفسار کیا کہ کیا وفاق کی طرز پر پنجاب میں ڈے کیئر سینٹرز کے لیے کوئی قانون موجود ہے؟ سیکرٹری ویمن ڈویلپمنٹ ثمن رائے نے بتایا کہ فی الحال پنجاب میں ڈے کیئر سینٹرز وزیراعلیٰ کے انیشیٹو کے تحت قائم کیے جا رہے ہیں۔

 رانا ارشد نے سوال کیا کہ کیا ڈے کیئر سینٹرز کو قانونی دائرے میں لانے کے لیے کوئی تجویز زیر غور ہے؟ ثمن رائے نے بتایا کہ فی الحال ایسی کوئی تجویز زیر غور نہیں، تاہم اس معاملے پر کام کیا جائے گا۔

 رانا ارشد نے کہا کہ حکومت کے اقدامات قابلِ تعریف ہیں، تاہم ڈے کیئر سینٹرز کے لیے قانونی فریم ورک ضروری ہے۔ قانون سازی سے یہ بھی واضح ہو سکے گا کہ کن اداروں کے لیے ڈے کیئر سینٹر قائم کرنا لازم ہوگا۔

 سیکرٹری ویمن ڈویلپمنٹ ثمن رائے نے کہا کہ کمیٹی کی تجویز پر پہلی فرصت میں اجلاس بلایا جائے گا اور کوشش ہوگی کہ جلد از جلد ڈے کیئر سینٹرز کے حوالے سے ایکٹ کا مسودہ تیار کر لیا جائے۔

 سیکرٹری ویمن ڈویلپمنٹ نے گزشتہ اجلاس میں بھی قائمہ کمیٹی کو قانون سازی کے حوالے سے یقین دہانی کرائی تھی۔

لاہور: صوبائی وزیر ایمرجنسی سروسز خواجہ سلمان رفیق نے ریسکیو ہیڈکوارٹرز کا خصوصی دورہ کیا اور پنجاب بھر کے ضلعی ایمرجنسی افسران سے آن لائن اجلاس کیا۔ سیکرٹری محکمہ ایمرجنسی سروسز ڈاکٹر رضوان نصیر نے صوبائی وزیر کو پنجاب بھر میں فائر ہائیڈرنٹس کی تنصیب اور کارکردگی کے حوالے سے بریفنگ دی۔

 بریفنگ میں بتایا گیا کہ پنجاب بھر میں مجموعی طور پر ایک ہزار 737 فائر ہائیڈرنٹس نصب کیے جا چکے ہیں، جن میں 691 ہسپتالوں جبکہ ایک ہزار 46 کمرشل مارکیٹس میں نصب ہیں۔ مزید اہم مقامات کی نشاندہی کرکے وہاں فائر ہائیڈرنٹس کی تنصیب کا عمل بھی جاری ہے۔

 خواجہ سلمان رفیق نے ضلعی ایمرجنسی افسران سے حقیقی فائر آپریشنز کے دوران فائر ہائیڈرنٹس کی افادیت اور دستیابی کے حوالے سے گفتگو کی۔ انہوں نے کہا کہ وزیراعلیٰ پنجاب مریم نواز شریف کے وژن کے مطابق ایمرجنسی سروسز کو نیکسٹ لیول پر لے جایا جا رہا ہے۔

 صوبائی وزیر نے کہا کہ ایئر ایمبولینس کے ذریعے سینکڑوں مریضوں کو بروقت طبی سہولیات فراہم کی گئی ہیں جبکہ موٹرویز پر بھی ایمرجنسی سروسز فراہم کی جا رہی ہیں۔ محکمہ ایمرجنسی سروسز کو اربوں روپے کے جدید آلات سے لیس کیا گیا ہے اور عوام کو بروقت امدادی خدمات کی فراہمی کے لیے نئی ایمبولینسز بھی خریدی گئی ہیں۔

 خواجہ سلمان رفیق نے ہدایت کی کہ کثیرالمنزلہ عمارات میں فائر سیفٹی اور آگ بجھانے کے مؤثر انتظامات پر عملدرآمد یقینی بنایا جائے۔ انہوں نے کہا کہ فائر سیفٹی کے اقدامات کے حوالے سے کسی دباؤ میں آئے بغیر میرٹ کے مطابق کام کیا جائے۔

 ان کا کہنا تھا کہ بلڈنگ سیفٹی پر عملدرآمد اور مختلف اداروں کی تربیتی مشقیں قیمتی انسانی جانیں بچانے میں اہم کردار ادا کر رہی ہیں۔ صوبائی وزیر نے ریسکیو اکیڈمی میں جاری تربیتی سیشن کا بھی مشاہدہ کیا۔