لاہور میں بسنت کے لیے 2 ہزار 2 سو 76 سیل پوائنٹس کو اجازت، کیو آر کوڈ کے بغیر فروخت پر پابندی

لاہور: لاہور میں بسنت کے تہوار کو محفوظ اور منظم بنانے کے لیے ضلعی انتظامیہ نے بڑے پیمانے پر اقدامات مکمل کر لیے ہیں۔ کمشنر لاہور مریم خان کے مطابق، شہر بھر میں پتنگوں اور ڈور کی فروخت کے لیے مجموعی طور پر 2 ہزار 2 سو 76 سیل پوائنٹس کو قانونی طور پر اجازت نامے جاری کر دیے گئے ہیں۔
 کمشنر لاہور مریم خان نے واضح کیا ہے کہ ہر مجاز سیل پوائنٹ پر پتنگ بازی کا سامان کیو آر کوڈ (QR Code) اور این او سی آف سیل (NOC of Sale) کے تحت فروخت کیا جائے گا۔ اس جدید نظام کا مقصد غیر قانونی اور جان لیوا خونی ڈور کی فروخت کو روکنا ہے تاکہ شہریوں کی جان و مال کو تحفظ فراہم کیا جا سکے۔
 انتظامیہ کے مطابق، اندرون لاہور کے 'ریڈ زون' علاقوں کے علاوہ شہر کے تمام دیگر علاقوں میں سیل پوائنٹس قائم کیے گئے ہیں۔ ان مخصوص مقامات کے علاوہ کہیں بھی پتنگ یا ڈور کی فروخت غیر قانونی تصور ہوگی۔ انتظامیہ نے شہریوں سے اپیل کی ہے کہ وہ ایک ذمہ دار شہری ہونے کا ثبوت دیں اور محفوظ بسنت کو یقینی بنانے کے لیے صرف ان دکانوں سے سامان خریدیں جن کے پاس حکومت کا جاری کردہ کیو آر کوڈ اور این او سی موجود ہو۔