اسلام آباد: اقتصادی رابطہ کمیٹی (ای سی سی) نے پوزیشن ہولڈر طلبہ کو مفت ای بائیکس دینے اور ای رکشوں پر سبسڈی کی منظوری دے دی ہے۔ وفاقی وزیر خزانہ محمد اورنگزیب کی زیر صدارت اجلاس میں الیکٹرک وہیکل پالیسی کے تحت یہ اہم فیصلہ کیا گیا۔
وفاقی وزارت خزانہ کے مطابق، پہلے مرحلے میں 40 ہزار ای بائیکس اور ایک ہزار ای رکشے فراہم کیے جائیں گے۔ سال 2025-26 کے دوران مجموعی طور پر 1 لاکھ 16 ہزار ای بائیکس اور 3,170 ای رکشے سبسڈی کے تحت دیے جائیں گے۔ اس مقصد کے لیے 9 ارب روپے کے فنڈز منظور کیے گئے ہیں۔
ای سی سی نے ترسیلات زر اسکیم کے واجبات کی ادائیگی کے لیے بھی 30 ارب روپے کی اضافی گرانٹ کی منظوری دی ہے۔ اجلاس کو بتایا گیا کہ اسکیم کے واجبات 58 ارب روپے سے تجاوز کر چکے ہیں۔
اجلاس میں قائداعظم یونیورسٹی کو دو ارب روپے کی بیل آؤٹ گرانٹ دینے کا فیصلہ بھی کیا گیا۔ کمیٹی نے یونیورسٹی انتظامیہ کو مالی خود کفالت کا منصوبہ جلد پیش کرنے کی ہدایت کی ہے۔