ایبٹ آباد: ایبٹ آباد انٹرنیشنل میڈیکل کالج میں ایسوسی ایشن آف پرائیویٹ سیکٹر یونیورسٹیز آف پاکستان کے زیراہتمام ’’2030 کا پاکستان، چیلنجز، امکانات اور نئی راہیں‘‘ کے عنوان سے ایک اہم سیمینار منعقد کیا گیا۔ سیمینار میں خطاب کرتے ہوئے ایپ سپ کے چیئرمین پروفیسر ڈاکٹر چودھری عبدالرحمان نے پاکستان کی 80 سالہ تاریخ کا جائزہ لیا اور ملک کے مستقبل کے حوالے سے اہم نکات پیش کیے۔
پروفیسر ڈاکٹر چودھری عبدالرحمان نے کہا کہ پاکستان کی آزادی کو 80 سال ہو چکے ہیں اور ہمیں اس بات پر غور کرنا چاہیے کہ اگلے 100 سال میں پاکستان کہاں کھڑا ہوگا۔ انہوں نے ملک کی موجودہ صورتحال پر بات کرتے ہوئے کہا کہ پاکستان میں 95 فیصد مسلمان آباد ہیں اور ہمارا ملک ایک مسلم ریاست ہے، لیکن شفافیت کے حوالے سے عالمی درجہ بندی میں ہم 135 ویں نمبر پر ہیں، جو کہ ایک بڑا چیلنج ہے۔
انہوں نے پاکستان کے تعلیمی شعبے میں میاں عامر محمود کی خدمات کی تعریف کرتے ہوئے کہا کہ وہ ایک عظیم پاکستانی رہنما ہیں، جنہوں نے 450 کالجز اور 4 یونیورسٹیاں قائم کر کے ملک کے تعلیمی معیار کو بہتر بنایا۔ پروفیسر عبدالرحمان نے کہا کہ میاں عامر محمود ہر سال ساڑھے 6 لاکھ طلبہ کو تعلیم کے ذریعے روشن کر رہے ہیں، جو ایک قابل فخر کارنامہ ہے۔
پروفیسر ڈاکٹر چودھری عبدالرحمان نے مزید کہا کہ ان کا ایبٹ آباد آنا صرف ماضی کی کامیابیوں کا جشن منانے کے لیے نہیں تھا، بلکہ ان کا مقصد پاکستان کے کل کو بہتر بنانا ہے۔ "اگر ہم انفرادی طور پر تبدیل نہیں ہوں گے، تو معاشرہ بھی تبدیل نہیں ہو سکتا۔ ہمیں ڈاکٹر یا انجینئر بننے سے پہلے ایک اچھا انسان بننا ہوگا"، انہوں نے کہا۔
انہوں نے اس بات پر بھی زور دیا کہ ہمیں اپنے گورننس ماڈل کو بہتر کرنے کی ضرورت ہے اور پورے پاکستان میں یہ آواز بلند ہو رہی ہے کہ اختیارات کو نچلی سطح پر منتقل کیا جانا چاہیے تاکہ حقیقی تبدیلی لائی جا سکے۔
پروفیسر ڈاکٹر چودھری عبدالرحمان نے سیمینار میں شریک نوجوانوں اور فیکلٹی کا شکریہ ادا کیا اور کہا کہ ہمیں اپنے مستقبل کو بہتر بنانے کے لیے ایک ساتھ کام کرنا ہوگا۔ "پاکستان کا 2030 کا منظرنامہ ایک چیلنج بھی ہے اور ایک موقع بھی۔ ہمیں ان دونوں کو سمجھ کر آگے بڑھنا ہوگا"، انہوں نے اپنے خطاب میں کہا۔