اسلام آباد: ترجمان سپارکو نے اعلان کیا ہے کہ آج رات پاکستان سمیت دنیا کے مختلف حصوں میں سال کا پہلا ‘سپر مون’ دیکھا جا سکے گا۔ اس دوران چاند زمین سے تقریباً دو لاکھ چوبیس ہزار میل کے فاصلے پر ہوگا، جو عام مکمل چاند کے مقابلے میں تقریباً 6.6 فیصد بڑا اور 13 فیصد زیادہ روشن نظر آئے گا۔
سپر مون سورج کے غروب ہوتے ہی مشرق کی سمت طلوع ہوگا اور طلوع آفتاب سے قبل مغرب میں غروب ہو جائے گا، جسے پاکستانی آسمان پر بھی واضح طور پر دیکھا جا سکے گا۔
سپارکو کے مطابق اس سال مزید دو سپر مونز نظر آئیں گے، جن میں سب سے روشن سپر مون 5 نومبر 2025 کو ہوگا جبکہ آخری سپر مون 5 دسمبر کو دیکھا جائے گا۔
ماہرین فلکیات کے مطابق سپر مون اس وقت ظہور پذیر ہوتا ہے جب چاند اپنی زمین کے مدار میں سب سے قریب ترین جگہ پر ہوتا ہے، جس کی وجہ سے یہ عام چاند کے مقابلے میں زیادہ بڑا اور روشن دکھائی دیتا ہے، اسی لیے اسے ‘سپر مون’ کا نام دیا گیا ہے۔