پنجاب میں چھوٹی صنعتوں کا انقلاب: 'ون ڈسٹرکٹ، ون پروڈکٹ' پلان کی منظوری، مریم نواز نے ہائی پاور کمیٹی تشکیل دے دی

لاہور : وزیراعلیٰ پنجاب مریم نواز شریف نے صوبے بھر میں چھوٹی صنعتوں کے فروغ اور مقامی معیشت کو مستحکم کرنے کے لیے ایک بڑے اور جامع پلان کا اعلان کر دیا ہے۔ اس منصوبے کے تحت پنجاب کے مختلف اضلاع کو ان کی مقامی پیداوار، مخصوص مہارت اور جغرافیائی ضروریات کے مطابق "انڈسٹریل ہب" (صنعتی مراکز) میں تبدیل کیا جائے گا۔
وزیراعلیٰ کے اس اقدام کا مقصد ہر ضلع کی منفرد پہچان اور وہاں کی روایتی مصنوعات کو عالمی معیار کے مطابق ڈھالنا ہے۔ اس پلان کے تحت  ہر ضلع اپنی مخصوص پروڈکٹ (جیسے سیالکوٹ کے کھیلوں کا سامان، قصور کا چمڑا، یا فیصل آباد کی ٹیکسٹائل) کے لیے پہچانا جائے گا۔
 مقامی ہنرمندوں کو جدید ٹیکنالوجی اور وسائل فراہم کر کے ان کی مہارت سے بھرپور فائدہ اٹھایا جائے گا۔ اضلاع کو مخصوص صنعتی زونز میں تقسیم کیا جائے گا تاکہ وہاں کی مصنوعات کی ایکسپورٹ میں اضافہ ہو سکے۔
اس بڑے معاشی منصوبے کی نگرانی اور عملدرآمد کے لیے وزیراعلیٰ نے 11 رکنی 'پنجاب اکنامک ٹرانسفارمیشن کمیٹی' تشکیل دے دی ہے۔کمیٹی کی سربراہی سینئر صوبائی وزیر مریم اورنگزیب کریں گی۔سیکرٹری خزانہ پنجاب کو اس کمیٹی کا سیکرٹری مقرر کیا گیا ہے۔کمیٹی میں معاشی ماہرین، متعلقہ محکموں کے سیکرٹریز اور صنعتی شعبے کے نمائندے شامل ہوں گے۔