بجلی چوروں کے خلاف بڑا کریک ڈاؤن: برکی گاؤں سے 14 افراد گرفتار، لاکھوں روپے جرمانہ وصول

لاہور : شہر کے نواحی علاقے برکی میں بجلی چوروں کے خلاف ضلعی انتظامیہ اور لیسکو ٹیموں نے مشترکہ کارروائی کرتے ہوئے بڑے پیمانے پر جاری غیر قانونی کنکشنز کا سراغ لگا لیا۔ کارروائی کے دوران متعدد افراد کو رنگے ہاتھوں پکڑ کر قانونی کارروائی کا آغاز کر دیا گیا ہے۔سکیورٹی ذرائع اور لیسکو حکام کے مطابق برکی گاؤں میں کی گئی اس ٹارگٹڈ کارروائی کے دوران درج ذیل حقائق سامنے آئے۔مجموعی طور پر 14 بجلی چوروں کو پکڑ لیا گیا جو کنڈا لگا کر بجلی چوری میں ملوث تھے۔ ملزمان گھریلو اور کمرشل پیمانے پر غیر قانونی ذرائع سے بجلی استعمال کر رہے تھے، جس سے قومی خزانے کو بھاری نقصان پہنچ رہا تھا۔
بجلی چوری کے ساتھ ساتھ ان صارفین کے خلاف بھی شکنجہ کسا گیا جو طویل عرصے سے بلوں کی ادائیگی نہیں کر رہے تھے۔ مہم کے دوران نا دہندگان سے موقع پر 7 لاکھ 50 ہزار روپے وصول کیے گئے۔ بل ادا نہ کرنے والے دیگر صارفین کو کنکشن منقطع کرنے کی سخت وارننگ جاری کر دی گئی ہے۔
لیسکو ترجمان کا کہنا ہے کہ بجلی چوری کے خلاف زیرو ٹالرنس (Zero Tolerance) کی پالیسی اپنائی گئی ہے۔ کسی بھی علاقے میں بجلی چوری کی اجازت نہیں دی جائے گی اور ملوث افراد کو بھاری جرمانے کے ساتھ جیل کی ہوا بھی کھانی پڑے گی۔