لاہور:پی ڈی ایم اے پنجاب کی رپورٹ کے مطابق دریائے راوی، ستلج اور چناب میں سیلابی صورتحال کے باعث مجموعی طور پر 4700 سے زائد موضع جات متاثر ہوئے ہیں۔
ریلیف کمشنر پنجاب نبیل جاوید کے مطابق دریائے چناب میں 2489، دریائے ستلج میں 701، اور دریائے راوی میں 1458 موضع جات سیلاب سے متاثر ہوئے ہیں۔ ان دریاؤں میں سیلاب کی وجہ سے تقریباً 45 لاکھ 70 ہزار افراد متاثر ہوئے، جن میں سے 25 لاکھ 12 ہزار افراد کو محفوظ مقامات پر منتقل کیا جا چکا ہے۔
شدید سیلاب زدہ علاقوں میں 392 ریلیف کیمپس، 493 میڈیکل کیمپس اور 422 ویٹرنری کیمپس قائم کیے گئے ہیں۔ ریسکیو اور ریلیف سرگرمیوں کے دوران 20 لاکھ 19 ہزار جانوروں کو بھی محفوظ مقامات پر منتقل کیا گیا ہے۔
منگلا ڈیم 93 فیصد، تربیلا ڈیم 100 فیصد، بھارتی بھاکڑا ڈیم 88 فیصد، پونگ ڈیم 94 فیصد، اور تھین ڈیم 89 فیصد تک بھر چکے ہیں۔
حالیہ سیلاب میں مختلف حادثات کے نتیجے میں 101 شہری جان بحق ہو چکے ہیں۔