عید کی آمد: لاہور میں سکیورٹی ہائی الرٹ، ڈولفن سکواڈ کا بڑا کریک ڈاؤن

لاہور: عید الفطر کے پرمسرت موقع پر شہر میں امن و امان کی صورتحال کو برقرار رکھنے کے لیے پولیس انتظامیہ نے سکیورٹی ہائی الرٹ کر دی ہے۔ شہر کے داخلی و خارجی راستوں سمیت اہم شاہراہوں پر پہرہ مزید سخت کر دیا گیا ہے۔
 شہریوں کے تحفظ کو یقینی بنانے کے لیے ڈولفن سکواڈ کی ٹیمیں لاہور کی تمام اہم شاہراہوں، تجارتی مراکز اور رش والے علاقوں میں مسلسل پٹرولنگ کر رہی ہیں۔ عید کی خریداری کے لیے نکلنے والے شہریوں کی حفاظت کے لیے سادہ لباس میں ملبوس اہلکار بھی تعینات کیے گئے ہیں۔
سکیورٹی ڈیوٹی کے ساتھ ساتھ ڈولفن سکواڈ نے فنانشل کرائم (مالیاتی جرائم) میں ملوث عناصر کے خلاف بھی گھیرا تنگ کر دیا ہے۔ حالیہ کریک ڈاؤن کے دوران اہم کامیابیاں حاصل ہوئی ہیں۔ فنانشل کرائم کے مختلف مقدمات میں مطلوب 9 خطرناک اشتہاریوں کو گرفتار کر لیا گیا ہے۔
 گرفتار ملزمان کو مزید تفتیش اور قانونی چارہ جوئی کے لیے متعلقہ تھانوں کے حوالے کر دیا گیا ہے۔سی سی پی او لاہور کے مطابق عید کی تعطیلات کے دوران کسی بھی ناخوشگوار واقعے سے نمٹنے کے لیے پولیس پوری طرح مستعد ہے اور جرائم پیشہ افراد کے خلاف زیرو ٹالرنس کی پالیسی اپنائی جا رہی ہے۔