نوجوانوں کے لیے بڑی خوشخبری: وزیراعلیٰ مریم نواز کا 'کلائمٹ لیڈر شپ انٹرن شپ پروگرام' کا اعلان

لاہور: وزیراعلیٰ پنجاب مریم نواز شریف نے صوبے کے نوجوانوں کے لیے ایک شاندار تعلیمی و معاشی پیکج کا آغاز کر دیا ہے، جس کے تحت 'کلائمٹ لیڈر شپ ڈویلپمنٹ انٹرن شپ پروگرام' متعارف کرایا گیا ہے۔ اس پروگرام کا مقصد نوجوانوں کو ماحولیاتی تبدیلیوں کے خلاف جنگ میں شامل کرنا اور انہیں بااختیار بنانا ہے۔
انٹرن شپ کے دوران منتخب نوجوانوں کو 60 ہزار روپے ماہانہ وظیفہ دیا جائے گا، جو کہ ملک میں کسی بھی سرکاری انٹرن شپ کے لیے ایک خطیر رقم ہے۔ 3 ماہ کی تربیت اور خدمات کی تکمیل پر حکومت پنجاب کی جانب سے نوجوانوں کو انٹرن شپ سرٹیفکیٹ بھی جاری کیا جائے گا، جو ان کے مستقبل کے کیریئر میں مددگار ثابت ہوگا۔
اس پروگرام کے تحت نوجوانوں کو ماحولیاتی تحفظ، شجرکاری اور کلائمٹ چینج جیسے اہم مسائل پر عملی کام کرنے کا موقع ملے گا۔
وزیراعلیٰ مریم نواز کا کہنا ہے کہ نوجوان پاکستان کا اصل سرمایہ ہیں اور انہیں ماحولیاتی لیڈر شپ کے مواقع فراہم کرنا وقت کی اہم ضرورت ہے۔ انہوں نے واضح کیا کہ اس اقدام سے نہ صرف بے روزگاری میں کمی آئے گی بلکہ پنجاب کو "گرین پنجاب" بنانے کے خواب کو بھی تقویت ملے گی۔