رمضان المبارک میں پنجاب بھر میں ہائی الرٹ: وزیراعلیٰ مریم نواز کا 'تھری لیئر' سکیورٹی پلان نافذ کرنے کا حکم

لاہور: وزیراعلیٰ پنجاب مریم نواز شریف نے رمضان المبارک کے مقدس مہینے میں صوبے بھر کے شہریوں کے جان و مال کے تحفظ کے لیے سکیورٹی کے انتہائی سخت اقدامات کرنے کی ہدایت جاری کر دی ہے۔ وزیراعلیٰ نے واضح کیا ہے کہ عبادت گاہوں اور عوامی مقامات پر فول پروف سکیورٹی کو ہر صورت یقینی بنایا جائے۔ حساس مقامات کی حفاظت کے لیے بیریئرز، خاردار تاروں اور تین درجاتی (Three-Layer) سکیورٹی پلان پر عملدرآمد کا حکم دیا گیا ہے۔
 تمام مساجد اور امام بارگاہوں کے باہر پولیس کے اضافی دستے تعینات کیے جائیں گے تاکہ نمازیوں اور روزہ داروں کو مکمل تحفظ فراہم کیا جا سکے۔بازاروں، مارکیٹوں اور دیگر پرہجوم عوامی مقامات پر اضافی اہلکار تعینات کرنے کی ہدایت کی گئی ہے تاکہ کسی بھی ناخوشگوار واقعے سے بچا جا سکے۔
وزیراعلیٰ مریم نواز نے پولیس حکام کو درج ذیل اقدامات میں تیزی لانے کا حکم دیا ہے۔ شہروں کے داخلی و خارجی راستوں اور اہم شاہراہوں پر پٹرولنگ اور اچانک تلاشی (Snap Checking) کے عمل کو سخت کیا جائے۔مشتبہ عناصر کی سرکوبی کے لیے انٹیلی جنس بیسڈ سرچ آپریشنز کا دائرہ کار وسیع کیا جائے۔
وزیراعلیٰ مریم نواز کا کہنا تھا کہ "رمضان المبارک میں عوام کے جان و مال کا تحفظ ہماری اولین ترجیح ہے، سکیورٹی کے معاملے میں کوئی غفلت برداشت نہیں کی جائے گی۔" انہوں نے انتظامیہ کو ہدایت کی کہ وہ شہریوں کی سہولت اور امن و امان برقرار رکھنے کے لیے چوبیس گھنٹے متحرک رہیں۔