لاہور: جماعت اسلامی کے امیر نے مینار پاکستان میں ہونے والے اجتماع عام کا جائزہ لیا اور کہا کہ یہ اجتماع ملک میں تبدیلی اور یکجہتی کی تحریک کا آغاز ہے۔
امیر جماعت اسلامی نے میڈیا سے گفتگو میں بتایا کہ اجتماع کے دوران ملک بھر سے قافلے پہنچیں گے اور پروگرام کے تیسرے روز تحریک کا مکمل لائحہ عمل بھی پیش کیا جائے گا۔ اجتماع نوجوانوں، خواتین اور طلبہ کے مسائل پر توجہ مرکوز کرے گا اور امید کا پیغام لے کر آئے گا۔
انہوں نے کہا کہ موجودہ عدالتی نظام اور تعلیمی شعبے میں مسائل ہیں، 83 فیصد انٹرمیڈیٹ پاس طلبہ آگے تعلیم حاصل نہیں کر پاتے اور خواتین و مزدور غیر رسمی شعبے میں کام کر رہے ہیں۔
اجتماع میں یوتھ، ڈیجیٹل، بزنس سیشنز کے علاوہ روحانی اور اخلاقی سرگرمیاں بھی شامل ہوں گی۔ 45 ممالک سے ماہرین اور عالمی اسلامی تحریکوں کے رہنما شرکت کریں گے، جبکہ فلسطین میں سرگرم افراد بھی اس موقع پر موجود ہوں گے۔
امیر جماعت اسلامی نے مزید کہا کہ یہ اجتماع ملک میں نوجوانوں، خواتین اور عوام کے مسائل کے حل کے لیے ایک اہم پلیٹ فارم ثابت ہوگا اور جماعت اسلامی ملک میں اقتدار کے لیے تیار ہے۔