مغربی سرحدوں پر کشیدگی: آئی جی پنجاب کا صوبہ بھر میں سکیورٹی ہائی الرٹ کرنے کا حکم، مساجد اور اہم تنصیبات کی حفاظت سخت

لاہور : مغربی سرحدوں کی موجودہ صورتحال اور امن و امان کے ممکنہ خطرات کے پیشِ نظر آئی جی پنجاب عبدالکریم نے پورے صوبے میں سکیورٹی انتہائی سخت کرنے کے احکامات جاری کر دیے ہیں۔
آئی جی پنجاب عبدالکریم کی زیرِ صدارت سکیورٹی انتظامات کا جائزہ لینے کے لیے ایک اہم ویڈیو لنک اجلاس منعقد ہوا۔ اجلاس میں لاہور اور راولپنڈی سمیت صوبہ بھر کے افسران کو الرٹ رہنے کی ہدایت کی گئی۔ آئی جی پنجاب نے حکم دیا کہ تمام آر پی اوز (RPOs)، سی پی اوز (CPOs) اور ڈی پی اوز (DPOs) فیلڈ میں نکلیں اور مساجد، دیگر عبادت گاہوں، مصروف مارکیٹوں اور اہم سرکاری تنصیبات کی سکیورٹی کا خود جائزہ لیں۔
    حساس مقامات کی نگرانی: سی سی ٹی وی کیمروں اور کمانڈ اینڈ کنٹرول سینٹرز کے ذریعے حساس مقامات کی 24 گھنٹے مانیٹرنگ کی جائے گی۔
    گشت میں اضافہ: اہم شاہراہوں اور عوامی مقامات پر پولیس گشت اور ڈولفن فورس کی موجودگی کو مزید مؤثر بنایا جائے گا۔
    سرچ آپریشنز: مشکوک افراد اور غیر قانونی مقیم غیر ملکیوں کے خلاف سرچ اور کومبنگ آپریشنز میں تیزی لانے کی ہدایت۔
اجلاس سے خطاب کرتے ہوئے آئی جی عبدالکریم کا کہنا تھا کہ شہریوں کی جان و مال کا تحفظ ہماری اولین ترجیح ہے۔ کسی بھی شرپسند عنصر کو امن و امان کی صورتحال خراب کرنے کی اجازت نہیں دی جائے گی۔ انہوں نے افسران کو تاکید کی کہ وہ سکیورٹی ڈیوٹی پر تعینات اہلکاروں کو خود بریف کریں اور ڈیوٹی میں کسی بھی قسم کی غفلت برداشت نہیں کی جائے گی۔