یومِ دفاع و شہداء، ملک بھر میں خصوصی تقریبات کا انعقاد

لاہور،کراچی ،اسلام آباد: یومِ دفاع و شہدا  ملک بھر میں عقیدت و احترام سے منایا جارہا ہے۔ 6 ستمبر 1965 کے شہداء اور غازیوں کی قربانیوں کو خراجِ عقیدت پیش کیا جائے گا۔

 یومِ دفاع کے موقع پر قوم وطن کے دفاع کے لیے جانوں کا نذرانہ دینے والے بہادر سپوتوں کو سلام پیش کرے گی۔ مختلف شہروں میں خصوصی تقریبات کا انعقاد کیا جائے گا، جبکہ شہداء کی یادگاروں پر حاضری اور پھولوں کی چادریں چڑھائی جائیں گی۔

 سرحدوں پر تعینات پاک فوج کے جوان بھی یومِ دفاع کے موقع پر وطن کی حفاظت کے عزم کا اعادہ کریں گے۔ ایل او سی پر جوان مشکل موسمی حالات کے باوجود اپنی ذمہ داریاں انجام دے رہے ہیں۔

 یومِ دفاع پر مختلف شعبہ ہائے زندگی سے تعلق رکھنے والی شخصیات اپنے پیغامات میں قومی یکجہتی اور ملکی ترقی کے لیے اتحاد و اتفاق کی ضرورت پر زور دیں گی۔

 نئی نسل بھی شہداء کی قربانیوں کو سلام پیش کرتے ہوئے تعلیم، محنت اور مثبت کردار کے ذریعے پاکستان کو مضبوط اور ترقی یافتہ بنانے کے عزم کا اظہار کرے گی۔

 6 ستمبر قوم کو اپنے شہداء کی قربانیوں کی یاد دلاتا ہے اور وطن کے دفاع، سلامتی اور خوشحالی کے لیے نئے عزم کی تجدید کا موقع فراہم کرتا ہے۔