لاہور میں سورج کی تپش برقرار: محکمہ موسمیات کی 28 مارچ سے بارش کی نوید

لاہور : باغوں کے شہر لاہور میں آج دن بھر سورج پوری آب و تاب کے ساتھ چمکتا رہا، جس کے باعث موسم خوشگوار لیکن قدرے گرم محسوس کیا گیا۔ محکمہ موسمیات کے مطابق شہر کا کم سے کم درجہ حرارت 17 ڈگری سینٹی گریڈ ریکارڈ کیا گیا ہے۔لاہور کے مختلف علاقوں میں آج آسمان صاف رہا اور دن بھر دھوپ کے جلوے بکھرے رہے۔ صبح اور رات کے وقت خنکی برقرار ہے، تاہم دوپہر کے وقت سورج کی تپش میں اضافے سے درجہ حرارت میں معمولی بڑھوتری دیکھی گئی۔
محققینِ موسم اور محکمہ موسمیات نے لاہوریوں کے لیے خوشخبری سناتے ہوئے کہا ہے کہ     28 سے 31 مارچ کے دوران شہر میں بادلوں کے ڈیرے ڈالنے کا امکان ہے۔    اس دوران گرج چمک کے ساتھ بارش کی پیشگوئی کی گئی ہے جس سے موسم ایک بار پھر سرد اور خوشگوار ہو جائے گا۔
ماہرین نے شہریوں کو مشورہ دیا ہے کہ وہ بدلتے ہوئے موسم اور متوقع بارشوں کے پیشِ نظر احتیاطی تدابیر اختیار کریں اور گھر سے باہر نکلتے وقت موسم کی تازہ ترین صورتحال سے باخبر رہیں۔