پولیس شہداء کے بچوں کے لیے تعلیمی تحفہ: 41 بچوں میں لیپ ٹاپ تقسیم، آئی جی پنجاب کا سکالرشپس کا اعلان

لاہور: آئی جی پنجاب راؤ عبدالکریم نے ایک پروقار تقریب کے دوران پولیس شہداء کے 41 بچوں میں جدید لیپ ٹاپ تقسیم کیے ہیں۔ اس اقدام کا مقصد شہداء کی فیملیز کی کفالت اور ان کے بچوں کو جدید تعلیمی سہولیات سے آراستہ کرنا ہے۔تقریب سے خطاب کرتے ہوئے آئی جی پنجاب راؤ عبدالکریم نے شہداء کی قربانیوں کو خراجِ عقیدت پیش کیا اور درج ذیل اہم نکات پر زور دیا۔ 
 آئی جی پنجاب کا کہنا تھا کہ "ملک و قوم کی خاطر اپنی جانیں نذرانہ کرنے والے اہلکاروں کی فیملیز ہماری ذمہ داری ہیں، ان کے لیے تمام دستیاب وسائل بروئے کار لائے جائیں گے۔ انہوں نے انکشاف کیا کہ شہداء کے بچوں کو اعلیٰ تعلیم کے حصول کے لیے نہ صرف ملکی بلکہ غیر ملکی تعلیمی اداروں میں بھی سکالرشپس فراہم کی جا رہی ہیں۔ لیپ ٹاپس کی تقسیم کا مقصد ان بچوں کو ڈیجیٹل دور کے تقاضوں کے مطابق تعلیم جاری رکھنے میں مدد دینا ہے۔
آئی جی پنجاب نے واضح کیا کہ محکمہ پولیس اپنے شہداء کو کبھی فراموش نہیں کرے گا۔ شہداء کے ورثاء کی ویلفیئر کے لیے جاری منصوبوں میں مزید وسعت لائی جائے گی تاکہ ان کے بچوں کا مستقبل محفوظ اور روشن ہو سکے۔