ملک کے مختلف علاقوں میں تیز ہواؤں اور گرج چمک کے ساتھ مزید بارش کی پیشگوئی

اسلام آباد: محکمہ موسمیات نے ملک کے مختلف حصوں میں تیز ہواؤں اور گرج چمک کے ساتھ مزید بارش کی اطلاع دی ہے۔ محکمہ کے مطابق گلگت بلتستان، کشمیر اور ملحقہ پہاڑی علاقوں میں چند مقامات پر تیز ہواؤں کے ساتھ بارش کا امکان ہے، جب کہ باقی علاقوں میں موسم زیادہ تر خشک رہنے کی توقع ہے۔

اسلام آباد میں موسم خشک اور جزوی ابرآلود رہے گا، جبکہ راولپنڈی، مری، گلیات، چکوال، جہلم، گجرات، لاہور، سیالکوٹ، نارووال اور وزیرآباد میں چند مقامات پر بارش متوقع ہے۔ بلوچستان کے ساحلی علاقوں میں بھی آسمان جزوی طور پر ابرآلود رہنے کا امکان ہے، جبکہ سندھ کے بیشتر اضلاع میں موسم گرم اور خشک رہے گا۔

خیبرپختونخوا کے دیر، چترال، سوات، کوہستان، شانگلہ اور بٹگرام میں بارش کی پیشگوئی ہے۔ گلگت بلتستان میں گرج چمک کے ساتھ بارش اور پہاڑوں پر برفباری کا بھی امکان ہے، جبکہ آزاد کشمیر میں بھی مزید بارش کی توقع ہے۔

گزشتہ 24 گھنٹوں کے دوران پنجاب، کشمیر، خیبرپختونخوا اور گلگت بلتستان میں تیز ہواؤں اور گرج چمک کے ساتھ بارش ہوئی، کچھ مقامات پر موسلادھار بارش بھی ریکارڈ کی گئی۔ ملک کے دیگر حصوں میں موسم گرم اور خشک رہا۔

دوسری جانب، پی ڈی ایم اے پنجاب نے دریاؤں میں پانی کے بہاؤ میں اضافے کا الرٹ جاری کیا ہے۔ خاص طور پر دریائے جہلم میں منگلا اپ اسٹریم پر پانی کی سطح بڑھنے کا خدشہ ہے، جس کی وجہ سے آئندہ 24 گھنٹوں میں درمیانے درجے کے سیلاب کا امکان ہے۔ پی ڈی ایم اے نے عوام سے اپیل کی ہے کہ وہ احتیاطی تدابیر اختیار کریں اور ہنگامی حالات کے لیے تیار رہیں۔