لاہور میں فضائی آلودگی بڑھ گئی، بھارت سے آنے والی ہواؤں نے ماحول متاثر کر دیا

لاہور : بھارت سے آنے والی ہواؤں کے اثرات کی وجہ سے لاہور کی فضا شدید آلودہ ہو گئی ہے، جبکہ دہلی دنیا کے سب سے زیادہ آلودہ شہروں میں سرفہرست ہے۔ ماہرین کے مطابق ہوا کے معیار میں یہ بگڑاؤ انسانی صحت کے لیے خطرناک ہے، خاص طور پر بچوں اور بزرگ شہریوں کے لیے۔

ایئر کوالٹی انڈیکس کے مطابق دہلی میں 274 ریکارڈ کیا گیا، جبکہ لاہور میں 228 رہا۔ لاہور کے مختلف علاقوں میں آلودگی کی شدت نمایاں رہی: لوئر مال 441، بیدیاں روڈ 324 اور رائیونڈ روڈ 310۔ ملتان میں اے کیو آئی 443 تک پہنچ گیا، جبکہ سیالکوٹ میں 294، گوجرانوالہ 278 اور بہاولپور میں 217 ریکارڈ کیا گیا۔

پنجاب حکومت نے سموگ سے نمٹنے کے لیے اقدامات شروع کر دیے ہیں اور شہریوں کو احتیاطی تدابیر اختیار کرنے کی ہدایت کی گئی ہے۔ ماہرین تجویز کرتے ہیں کہ لوگ زیادہ وقت باہر نہ گزاریں، ماسک کا استعمال کریں اور آلودہ علاقوں میں کھڑکیاں بند رکھیں۔

ماحولیاتی ماہرین کا کہنا ہے کہ بھارت سے آنے والی آلودہ ہوا کے ساتھ مقامی آلودگی کے عوامل بھی شامل ہیں، اور مستقل حل کے لیے صنعتی اور ٹریفک آلودگی پر قابو پانا ضروری ہے۔