پی ٹی آئی کی حرکتیں ناقابل قبول، قومی سلامتی پر کوئی سمجھوتہ نہیں ہوگا:عظمیٰ بخاری

لاہور:لاہور:پنجاب کی وزیر اطلاعات عظمیٰ بخاری نے پریس کانفرنس میں پی ٹی آئی اور اس کے قائد کے حوالے سے سخت موقف اپنایا۔ انہوں نے کہا کہ اگر پی ٹی آئی اپنی غیر ذمہ دارانہ حرکتوں سے باز نہ آئی تو پارٹی پر پابندی لگانے کے اقدامات کیے جا سکتے ہیں اور ضرورت پڑنے پر گورنر راج بھی نافذ کیا جا سکتا ہے۔

وزیر اطلاعات نے کہا کہ پاکستان کی سلامتی کسی بھی حالت میں خطرے میں نہیں آنے دی جائے گی۔ انہوں نے واضح کیا کہ جو لوگ گزشتہ دنوں ملک کے خلاف سرگرم رہے، وہ آج بھی اسی رویے پر قائم ہیں، اور ایک ادارے کے سربراہ کے خلاف پراپیگنڈہ کرنے والوں کے خلاف لازمی ردعمل آئے گا۔

عظمیٰ بخاری نے کہا کہ خیبر پختونخوا کے عوام نے ہری پور میں مقبول لیڈر کو مسترد کر کے ملک کے عوامی رویے کو ظاہر کر دیا ہے۔ انہوں نے پی ٹی آئی کے قائد کے رویے پر بھی تنقید کرتے ہوئے کہا کہ ضرورت پڑنے پر ان کا طبی معائنہ کرانا چاہیے تاکہ صحت اور رویے کے حوالے سے صورتحال کا جائزہ لیا جا سکے۔

وزیر اطلاعات نے زور دیا کہ پاکستان کے مفاد کے خلاف کسی بھی سرگرمی کی اجازت نہیں دی جائے گی، اور قومی سلامتی ہر حالت میں مقدم رہے گی۔