پنجاب میں گندم اور آٹے کی قیمتیں برقرار رکھنے کے لیے بڑا فیصلہ: پاسکو سے 10 لاکھ میٹرک ٹن گندم خریدنے کی منظوری

لاہور: وزیراعلیٰ پنجاب کی زیر صدارت ایک اہم ویڈیو لنک اجلاس منعقد ہوا، جس میں صوبے بھر میں گندم اور آٹے کی موجودہ صورتحال کا تفصیلی جائزہ لیا گیا اور اس حوالے سے ایک جامع رپورٹ پیش کی گئی۔صوبے کے عوام کو سستے آٹے کی فراہمی اور مارکیٹ میں استحکام کے لیے اجلاس میں درج ذیل اہم فیصلے کیے گئے۔
 وزیراعلیٰ پنجاب نے پاسکو (PASCO) سے ایک ملین (10 لاکھ) میٹرک ٹن گندم خریدنے کی باقاعدہ منظوری دے دی ہے، تاکہ صوبے میں گندم کے ذخائر کو مستحکم کیا جا سکے۔ صوبے میں آٹے کی قیمتوں کو کنٹرول میں رکھنے کے لیے فلور ملوں کو 3 ہزار 300 روپے فی من کے حساب سے گندم فراہم کرنے کا فیصلہ کیا گیا ہے۔
اجلاس میں یہ اہم فیصلہ بھی کیا گیا کہ پنجاب اپنی غذائی ضروریات کو پورا کرنے کے بعد برادر صوبے خیبرپختونخوا کو بھی گندم فراہم کرے گا تاکہ وہاں بھی آٹے کا بحران پیدا نہ ہو۔
ان اقدامات کا بنیادی مقصد پنجاب سمیت دیگر علاقوں میں گندم اور آٹے کی قیمتوں میں استحکام کو یقینی بنانا اور ذخیرہ اندوزی کا خاتمہ کرنا ہے۔