وزیراعلیٰ مریم نواز شریف کا پنجاب کے بیوٹیفکیشن پلان فیز کی تکمیل کے لیے فروری سے مئی تک کا ہدف

لاہور: وزیراعلیٰ پنجاب مریم نواز شریف نے صوبے کے 39 اضلاع میں بیوٹیفکیشن منصوبوں کی تکمیل کے لیے فروری سے مئی تک کا ہدف مقرر کر دیا ہے۔ اس سلسلے میں ایک خصوصی اجلاس کی صدارت کرتے ہوئے وزیراعلیٰ نے 132 بیوٹیفکیشن سکیموں کی تفصیلات کا جائزہ لیا اور تمام متعلقہ حکام کو جلد از جلد ان منصوبوں کی تکمیل کے لیے کام کرنے کی ہدایت دی۔

بیوٹیفکیشن پلان کی مجموعی لاگت 16 ارب 90 کروڑ روپے ہے، جس کے تحت پنجاب کے مختلف شہروں میں سڑکوں، بازاروں، تاریخی مقامات اور دیگر اہم علاقوں کو جدید اور دلکش بنایا جائے گا۔ ان منصوبوں میں لاہور، سرگودھا، بہاولپور، گوجرانوالہ، راولپنڈی، فیصل آباد، ملتان اور ساہیوال جیسے بڑے شہروں کے علاوہ صوبے کے دیگر علاقوں میں بھی تبدیلی لانے کی کوشش کی جا رہی ہے۔

وزیراعلیٰ مریم نواز شریف نے بیوٹیفکیشن سکیموں میں قدیم دروازوں کی بحالی، فائبر گلاس اور ٹین سائل کور کی تنصیب، روایتی گرے ٹائلز کی جگہ رنگین ٹائلز کا استعمال، فوارے اور مصنوعی آبشاروں کی تخلیق، اور مرکزی بازاروں میں گرین بیلٹس بنانے کا حکم دیا۔ انہوں نے یہ بھی کہا کہ ان منصوبوں کی مانیٹرنگ کے لیے ایک ڈیش بورڈ بنایا جائے گا اور اس کی ہفتہ وار اپ ڈیٹ کی جائے گی۔

وزیراعلیٰ کا کہنا تھا کہ "ہمارا مقصد ہر شہر، ہر قصبہ اور ہر ضلع کو اینڈ ٹو اینڈ بیوٹیفائی کرنا ہے تاکہ عوام کو ایک بہترین اور صاف ستھرا ماحول فراہم کیا جا سکے۔" اس کے ساتھ ہی مریم نواز نے عوامی سہولت کو بھی اولین ترجیح قرار دیتے ہوئے کہا کہ بیوٹیفکیشن پراجیکٹس کے دوران عوام کو کسی قسم کی تکلیف یا مشکلات کا سامنا نہیں ہوگا۔

بیوٹیفکیشن پلان کی تکمیل کے لیے مخصوص اہداف بھی مقرر کیے گئے ہیں، جن کے تحت مختلف شہروں میں کئی منصوبے مارچ اور مئی تک مکمل ہوں گے، جیسے کہ بہاولپور میں بابا فرید گیٹ اور فیصل آباد میں 121 سال قدیم گھنٹہ گھر کی بحالی۔