ملک بھر میں شدید بارشوں کا امکان، شہریوں کو الرٹ رہنے کی ہدایت

اسلام آباد : محکمہ موسمیات نے آئندہ چند روز میں ملک کے مختلف حصوں میں بارشوں کی شدت میں اضافے کی پیشگوئی کرتے ہوئے شہریوں اور متعلقہ اداروں کو الرٹ رہنے کی ہدایت جاری کی ہے۔

پنجاب ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق، اس وقت مغربی ہواؤں کا ایک فعال سلسلہ ملک کے شمالی اور بالائی علاقوں پر اثر انداز ہو رہا ہے، جس کے باعث ان علاقوں میں نمی اور ٹھنڈک میں اضافہ ہوا ہے۔ ترجمان نے کہا کہ آج اسلام آباد، پنجاب کے مختلف اضلاع، بالائی خیبر پختونخوا، آزاد کشمیر اور گلگت بلتستان میں کہیں ہلکی اور کہیں موسلادھار بارش کا امکان ہے۔

ترجمان نے مزید بتایا کہ 17 اگست سے مغربی ہواؤں کی شدت میں اضافہ متوقع ہے، جس سے بارشوں کا سلسلہ مزید تیز ہو جائے گا۔ اسلام آباد، راولپنڈی، لاہور، گوجرانوالہ، سرگودھا، ایبٹ آباد، مظفرآباد، گلگت اور دیگر علاقوں میں تیز بارشوں، گرج چمک اور تیز ہواؤں کا خدشہ ہے۔

محکمہ موسمیات کے مطابق 17 اگست کے بعد خلیج بنگال سے مرطوب ہواؤں کا ایک نیا سلسلہ ملک میں داخل ہو گا، جو مغربی ہواؤں کے ساتھ مل کر ایک طاقتور موسمی نظام تشکیل دے گا۔ اس کے نتیجے میں 18 سے 21 اگست تک کراچی، حیدرآباد، سکھر، کوئٹہ، پشاور، اسلام آباد، لاہور، فیصل آباد اور دیگر شہروں میں شدید بارشوں کا امکان ہے۔

پی ڈی ایم اے نے شہریوں کو خبردار کیا ہے کہ اس دوران پہاڑی علاقوں میں لینڈ سلائیڈنگ، جب کہ شہری اور نشیبی علاقوں میں اربن فلڈنگ اور ندی نالوں میں طغیانی کا خطرہ بڑھ جائے گا۔

ترجمان نے عوام سے اپیل کی ہے کہ وہ غیر ضروری سفر سے گریز کریں، کھلے مقامات پر موجود رہنے سے احتیاط کریں، ندی نالوں کے قریب رہائش پذیر افراد نقل مکانی پر غور کریں، اور موسمی اپ ڈیٹس پر مسلسل نظر رکھیں۔ ترجمان نے زور دیا کہ حفاظتی اقدامات پر عمل درآمد کر کے جانی و مالی نقصان سے بچا جا سکتا ہے۔