لاہور میں بارش سے موسم خوشگوار: فضائی آلودگی کا خاتمہ، درجہ حرارت 12 ڈگری تک گر گیا

لاہور : صوبائی دارالحکومت اور گردونواح میں ہونے والی بارش نے جہاں شہر کا نقشہ بدل دیا، وہی شہریوں کو شدید گرمی اور حبس سے بڑی راحت بھی فراہم کر دی ہے۔ بارش اور ٹھنڈی ہوائیں چلنے سے شہر کے درجہ حرارت میں نمایاں کمی ریکارڈ کی گئی ہے، جس سے موسم انتہائی خوشگوار ہو گیا ہے۔
محکمہ موسمیات کے مطابق بارش کے اس سپیل نے شہر کے مجموعی درجہ حرارت پر مثبت اثرات مرتب کیے ہیں۔ شہر کا کم سے کم درجہ حرارت 12 ڈگری سینٹی گریڈ ریکارڈ کیا گیا، جس سے خنکی میں اضافہ ہوا ہے۔ بارش کے باعث فضا میں موجود گرد و غبار اور سموگ کے ذرات بیٹھ گئے ہیں، جس سے ایئر کوالٹی انڈیکس (AQI) میں واضح بہتری آئی ہے اور شہریوں نے سکھ کا سانس لیا ہے۔
شہر کے مختلف علاقوں میں ہلکی اور تیز ہواؤں کا سلسلہ جاری ہے جس نے موسم کی رخی بدل دی ہے۔ سیاہ بادلوں کے ڈیرے اور ٹھنڈی ہواؤں نے شہریوں کو پارکوں اور سیرگاہوں کا رخ کرنے پر مجبور کر دیا ہے۔
محکمہ موسمیات نے لاہوریوں کے لیے مزید خوشخبری سناتے ہوئے کہا ہے کہ بارش برسانے والا سسٹم تاحال فعال ہے، جس کے باعث آئندہ 24 گھنٹوں کے دوران شہر کے مختلف حصوں میں مزید بارش کا قوی امکان ہے۔حکام نے شہریوں کو مشورہ دیا ہے کہ وہ بدلتے ہوئے موسم میں احتیاطی تدابیر اختیار کریں، خاص طور پر بجلی کے کھمبوں سے دور رہیں اور سفر کے دوران احتیاط برتیں۔