وزیراعلیٰ پنجاب مریم نواز کا اوزون کے تحفظ کے عالمی دن پر پیغام

لاہور: وزیراعلیٰ پنجاب مریم نواز شریف نے اوزون کے تحفظ کے عالمی دن پر کہا ہے کہ اوزون ہماری ماحولیات کی محافظ ہے اور اسے بچانا انسانیت کا اہم ترین فریضہ ہے۔ اوزون کی تباہی کے نتیجے میں مختلف امراض، فصلوں کی بربادی اور نسل نو کے مستقبل کے لیے سنگین خطرات لاحق ہو جاتے ہیں۔

مریم نواز نے کہا کہ موسمیاتی تبدیلیوں نے بارشوں کے انداز بدل دیے ہیں، جس کا خمیازہ پنجاب حالیہ تباہ کن سیلاب کی شکل میں بھگت رہا ہے۔ پہلی بار پنجاب کے لیے جامع ماحولیاتی پالیسی مرتب کی گئی ہے تاکہ زمین کو بچوں کے لیے محفوظ بنایا جا سکے۔

وزیراعلیٰ نے بتایا کہ پنجاب میں ماحول دوست الیکٹرو بسیں متعارف کروائی گئی ہیں جو کلین انرجی سے چلتی ہیں اور آلودگی کم کرتی ہیں۔ “پلانٹ فار پاکستان” مہم کے تحت شجرکاری کا عمل جاری ہے جس سے فضا کو دوبارہ صاف اور سانس لینے کے قابل بنایا جا رہا ہے۔

مریم نواز شریف نے کہا کہ پنجاب تیزی سے گرین انرجی، سولرائزیشن اور دیگر ماحول دوست منصوبوں کی طرف بڑھ رہا ہے۔ انہوں نے شہریوں پر زور دیا کہ اوزون کی حفاظت صرف حکومت کی نہیں بلکہ ہر فرد کی ذمہ داری ہے، اور سب کو چاہیے کہ اپنی فضا، پانی اور زمین کو آئندہ نسلوں کے لیے محفوظ بنانے میں اپنا کردار ادا کریں۔

وزیراعلیٰ نے یقین دلایا کہ پنجاب سرسبز، صاف اور محفوظ مستقبل کی طرف گامزن ہے اور ترقی کا یہ سفر اب کسی صورت نہیں رکے گا۔