پنجاب سیف سٹیز اتھارٹی کا ڈرون ٹیکنالوجی سے کریک ڈاؤن: صوبہ بھر میں جرائم اور پتنگ بازی کے خلاف بڑی کارروائیاں

لاہور: پنجاب سیف سٹیز اتھارٹی نے صوبہ بھر میں امن و امان کے قیام اور جرائم کی بیخ کنی کے لیے جدید ڈرون ٹیکنالوجی کا موثر استعمال شروع کر دیا ہے۔ ڈرون سرویلنس کے ذریعے کرائم ہاٹ سپاٹس، ٹریفک قوانین کی خلاف ورزی، پتنگ بازی اور سموگ کا باعث بننے والے عوامل کی فوری نشاندہی کر کے پولیس ایکشن کو تیز تر بنا دیا گیا ہے۔
ترجمان سیف سٹیز اتھارٹی کے مطابق، ڈرون ٹیموں نے لاہور کے مختلف علاقوں میں مانیٹرنگ کے دوران پتنگ بازی میں ملوث افراد کی نشاندہی کی۔ نشاندہی ہوتے ہی فیلڈ پولیس نے فوری کارروائی کرتے ہوئے متعدد خلاف ورزیوں کو روکا۔
جدید ڈرونز کے ذریعے شہر کے ان مقامات پر کڑی نظر رکھی جا رہی ہے جہاں جرائم کی شرح زیادہ ہے۔ حالیہ آپریشن کے دوران درج ذیل علاقوں میں مشکوک سرگرمیوں اور کرائم کی نشاندہی کی گئی،    شمالی و جنوبی لاہور: شاد باغ، بادامی باغ اور کرول گھاٹی۔    رہائشی و تجارتی علاقے: وحدت کالونی، علامہ اقبال ٹاؤن، نشتر کالونی اور کاہنہ۔
سیف سٹیز اتھارٹی صرف جرائم ہی نہیں بلکہ دیگر سماجی و ماحولیاتی مسائل کے حل کے لیے بھی ڈرونز کا استعمال کر رہی ہے۔   پنجاب سیف سٹیز اتھارٹی کا کہنا ہے کہ جدید ٹیکنالوجی کے انضمام سے پولیس کا رسپانس ٹائم بہتر ہوا ہے اور انسانی آنکھ سے اوجھل علاقوں تک رسائی ممکن ہو گئی ہے، جس سے جرائم پیشہ عناصر کے گرد گھیرا تنگ ہو رہا ہے۔