مریم نواز کا پنجاب کو فلم اور ٹیکنالوجی کا مرکز بنانے کا عزم، شرمین عبید چنائے کے ساتھ 'فلم سٹی' پر مشاورت

لاہور: وزیراعلیٰ پنجاب مریم نواز نے کہا ہے کہ پنجاب کے نوجوانوں کے پاس بے پناہ ٹیلنٹ ہے جسے عالمی سطح پر متعارف کروانے کے لیے نواز شریف آئی ٹی سٹی (NSIT) میں ایک جدید 'فلم سٹی' قائم کی جا رہی ہے۔ ان خیالات کا اظہار انہوں نے آسکر ایوارڈ یافتہ پاکستانی فلم ساز شرمین عبید چنائے سے ملاقات کے دوران کیا۔
ملاقات کے دوران وزیراعلیٰ نے شرمین عبید چنائے کی دستاویزی فلم سازی اور صحافت کے شعبے میں بین الاقوامی کامیابیوں کو سراہتے ہوئے کہا کہ ان کی مہارت سے پنجاب کے نئے منصوبے کو چار چاند لگ سکتے ہیں۔ دونوں شخصیات نے فلم سٹی کے ڈیزائن، پروڈکشن ہاؤسز اور اکیڈمی کے قیام کے حوالے سے مختلف تجاویز پر تبادلہ خیال کیا۔
اس موقع پر مریم نواز اور شرمین عبید چنائے نے منصوبے کی کامیابی کے لیے اشتراکِ کار پر اتفاق کیا۔ وزیراعلیٰ کا کہنا تھا کہ پنجاب فلم سٹی نہ صرف روزگار کے نئے مواقع پیدا کرے گی بلکہ یہ خطے میں ثقافتی اور ڈیجیٹل انقلاب کا پیش خیمہ ثابت ہوگی۔ شرمین عبید چنائے نے حکومت پنجاب کے اس وژن کو سراہتے ہوئے اپنی مکمل تکنیکی حمایت کا یقین دلایا۔