لاہور: ٹریفک مسائل کا حل، ٹیپا  کا کچہری چوک سے سنٹرل ماڈل سکول تک انڈر پاس تعمیر کرنے کا فیصلہ 

لاہور:ٹریفک اینڈ انجینئرنگ پلاننگ ایجنسی (ٹیپا) نے کچہری چوک سے سنٹرل ماڈل سکول تک انڈر پاس تعمیر کرنے کا فیصلہ کر لیا ہے۔

اس منصوبے کا مقصد اس اہم شاہراہ پر ٹریفک کے بہاؤ کو رواں رکھنا اور شہریوں کو روزانہ کی پریشانی سے نجات دلانا ہے۔ انڈر پاس کی تعمیر سے نہ صرف ٹریفک کا دباؤ کم ہوگا بلکہ اردگرد کے علاقوں میں فضائی آلودگی اور وقت کا ضیاع بھی کم ہونے کی توقع ہے۔

دوسری جانب سول کورٹس میں وکلا اور سائلین کی آسانی کے لیے ناصر باغ سے سول کورٹ تک پیڈسٹرین برج بنانے کا بھی اعلان کیا گیا ہے۔ اس برج کے ذریعے وکلا اور دیگر راہگیر محفوظ انداز میں سڑک عبور کر سکیں گے، جو ایک دیرینہ مطالبہ تھا۔

ٹیپا کے ذرائع کے مطابق، دونوں منصوبوں پر جلد کام شروع کر دیا جائے گا اور انہیں جلد از جلد مکمل کرنے کی ہدایات جاری کی گئی ہیں۔