لاہور: شاہدرہ میں کار ٹکر کیس، ملزم حاشر عمر جوڈیشل ریمانڈ پر، پولیس کی جسمانی ریمانڈ کی درخواست مسترد

لاہور :ضلع کچہری لاہور کی عدالت میں شاہدرہ میں کار کی ٹکر سے ایک نوجوان کے جاں بحق اور دو افراد کے زخمی ہونے کے واقعے کے مقدمے میں ملزم حاشر عمر کو جوڈیشل ریمانڈ پر بھیجنے کا فیصلہ جاری کر دیا گیا ہے۔

جوڈیشل مجسٹریٹ رانا شہر یار نے تحریری فیصلے میں حکم دیا ہے کہ پولیس ملزم کا چالان مکمل کرے اور اسے 26 جولائی کو عدالت میں پیش کرے۔ عدالت نے پولیس کی ملزم حاشر عمر کے جسمانی ریمانڈ کی درخواست کو مسترد کر دیا۔

تفتیشی افسر نے شریک ملزم اعجاز کی گرفتاری کے لیے دس روزہ ریمانڈ کی استدعا کی تھی، تاہم عدالت نے اسے بھی منظور نہیں کیا۔ عدالت نے نوٹ کیا کہ پچھلے چار روزہ جسمانی ریمانڈ میں تفتیشی افسر نے کوئی رپورٹ پیش نہیں کی۔

عدالت نے مزید کہا کہ ملزم کی عمر کے تعین کے لیے ٹیسٹ پولیس چالان کے ساتھ جمع کرا سکتی ہے، اور ملزم حاشر کو شریک ملزم اعجاز کی گرفتاری کے لیے ریمانڈ نہیں دیا جا سکتا۔

یہ فیصلہ پولیس کی جانب سے تفتیشی عمل میں تاخیر اور ناقص کارروائی کے باعث دیا گیا ہے۔ عدالت نے واضح کیا ہے کہ پولیس کو جلد از جلد مقدمے کی کارروائی مکمل کرنی چاہیے۔