آپ کا مشورہ درکار نہیں، پنجاب حکومت اپنی ذمہ داری بخوبی نبھا رہی ہے:"عظمیٰ بخاری کا گورنر پنجاب کو سخت جواب

لاہور:وزیر اطلاعات پنجاب عظمیٰ بخاری نے گورنر پنجاب کے کھلے خط پر سخت ردعمل دیتے ہوئے کہا کہ انہیں کھلا خط لکھنے کی کوئی ضرورت نہیں تھی، کیونکہ پنجاب حکومت سیلاب متاثرین کے لیے امدادی سرگرمیاں پہلے ہی شروع کر چکی ہے۔

عظمیٰ بخاری نے گورنر کے بیان پر معذرت کے ساتھ کہا کہ انہیں بار بار ان کا آئینی کردار یاد کروانا پڑتا ہے، لیکن وہ اپنی غلطیوں سے باز نہیں آتے۔ وزیر اطلاعات نے مزید کہا کہ پنجاب حکومت تمام انتظامی امور اپنے کنٹرول میں رکھ کر چل رہی ہے، اور اس میں کسی کی مشورے کی ضرورت نہیں ہے۔

انہوں نے یہ بھی کہا کہ اگر گورنر صاحب کسی کو جگانے کی کوشش کرنا چاہتے ہیں، تو انہیں اپنی جماعت اور حکومت کو خط لکھنا چاہیے، نہ کہ پنجاب حکومت کو۔ عظمیٰ بخاری نے وضاحت کی کہ مریم نواز کی رہنمائی میں پنجاب کے تمام ادارے متاثرہ افراد کی امداد اور بحالی میں مصروف ہیں، اور مریم نواز نے سیلاب کی صورتحال کے بعد فوری طور پر چکوال پہنچ کر متاثرین سے ملاقات کی تھی۔

عظمیٰ بخاری نے مزید کہا کہ گورنر پنجاب کو اپنے آئینی کردار کے مطابق کام کرنا چاہیے اور سیاسی مشورے اپنی جماعت کو دینے چاہئیں۔ آخر میں انہوں نے گورنر کو تنقید کرتے ہوئے کہا کہ عوام نے مریم نواز کو مینڈیٹ دیا ہے، اور گورنر صاحب کو فوٹو سیشن اور نمائشی دوروں سے اجتناب کرنا چاہیے۔