پنجاب کے تعلیمی بورڈز نے جماعت نہم کے نتائج کا اعلان کر دیا

لاہور: پنجاب کے مختلف تعلیمی بورڈز نے جماعت نہم (نویں جماعت) کے سالانہ امتحانات 2025 کے نتائج کا اعلان کر دیا ہے۔ صوبے بھر کے لاکھوں طلباء و طالبات نے ان امتحانات میں شرکت کی، جن میں کامیابی کی مجموعی شرح مختلف بورڈز میں ملا جلا رجحان ظاہر کرتی ہے۔

لاہور بورڈ کے مطابق اس سال تقریباً 3 لاکھ 80 ہزار طلباء نے امتحان دیا، جن میں سے ایک لاکھ 38 ہزار سے زائد کامیاب قرار پائے۔ لڑکیوں کی کامیابی کی شرح 53.89 فیصد جبکہ لڑکوں کی کامیابی کی شرح صرف 35.33 فیصد رہی، جو ایک نمایاں فرق کو ظاہر کرتی ہے۔

گوجرانوالہ بورڈ کے تحت 2 لاکھ 71 ہزار 465 امیدواروں نے امتحان میں حصہ لیا، جن میں سے 1 لاکھ 34 ہزار 20 طلباء کامیاب ہوئے، اور مجموعی کامیابی کی شرح 49.37 فیصد رہی۔

ملتان بورڈ کے نتائج کے مطابق، یہاں 1 لاکھ 44 ہزار 582 طلباء نے امتحان دیا، جن میں کامیابی کی شرح 52.11 فیصد ریکارڈ کی گئی۔

فیصل آباد بورڈ میں 2 لاکھ 5 ہزار 182 امیدواروں نے امتحان دیا، جن میں سے مجموعی طور پر 51.55 فیصد کامیاب ہوئے۔