لاہور: پنجاب بھر میں یوم شہداء پولیس عقیدت و احترام سے منایا گیا

لاہور: پنجاب بھر میں آج 4 اگست کو یوم شہداء پولیس عقیدت و احترام سے منایا گیا۔ اس موقع پر مختلف شہروں میں پروقار تقریبات کا انعقاد کیا گیا، جہاں پولیس کے شہداء کی قربانیوں کو خراج تحسین پیش کیا گیا۔ شہداء کی یاد میں شمعیں روشن کی گئیں اور قرآن خوانی و دعائیہ تقریبات کا اہتمام بھی کیا گیا۔

ترجمان پنجاب پولیس کے مطابق، یوم شہداء پولیس ہر سال 4 اگست کو منایا جاتا ہے تاکہ پولیس فورس کے اُن بہادر جوانوں کی قربانیوں کو یاد رکھا جا سکے جنہوں نے ملک و قوم کی خاطر اپنی جانوں کا نذرانہ پیش کیا۔

صوبے بھر میں آر پی اوز، سی پی اوز، ڈی پی اوز اور دیگر اعلیٰ پولیس افسران نے شہداء کی یادگاروں پر حاضری دی، پھول چڑھائے اور شہداء کے اہل خانہ کے ساتھ اظہار یکجہتی کیا۔ تقریبات میں سول سوسائٹی، مقامی شہریوں اور طلباء و طالبات نے بھی بھرپور شرکت کی، جنہوں نے شہداء کے لیے دعائیں کیں اور ان کی قربانیوں کو سراہا۔

آئی جی پنجاب ڈاکٹر عثمان انور نے اپنے پیغام میں کہا کہ پولیس کے شہداء کی لازوال قربانیاں ہمیشہ قوم کے دلوں میں زندہ رہیں گی۔ انہوں نے کہا کہ شہداء جرات و بہادری کی روشن مثال ہیں، اور ان کی خدمات کو کبھی فراموش نہیں کیا جائے گا۔ انہوں نے مزید کہا کہ پنجاب پولیس شہداء کے اہل خانہ کی فلاح و بہبود کو اپنی اولین ترجیح سمجھتی ہے۔

ڈاکٹر عثمان انور نے یوم شہداء پولیس کو تجدید عہد کا دن قرار دیا اور کہا کہ زندہ قومیں اپنے ہیروز کو کبھی نہیں بھولتیں۔