دو دن میں اُتار چڑھاؤ، سونا پہلے سستا پھر مہنگا

کراچی : ملک میں سونے کی قیمتوں نے ایک بار پھر بلندی کا رخ اختیار کر لیا ہے۔ تازہ ترین اعداد و شمار کے مطابق فی تولہ سونا 3,200 روپے مہنگا ہو کر 3 لاکھ 54 ہزار 700 روپے تک پہنچ گیا ہے۔

اسی طرح، 10 گرام سونے کی قیمت میں بھی 2,744 روپے کا اضافہ ہوا ہے، جس کے بعد نئی قیمت 3 لاکھ 4 ہزار 700 روپے ریکارڈ کی گئی ہے۔

عالمی منڈی میں بھی سونے کی قدر میں بہتری دیکھی گئی، جہاں فی اونس قیمت 32 ڈالر بڑھ کر 3,324 ڈالر ہو گئی ہے۔ ماہرین کا کہنا ہے کہ بین الاقوامی سطح پر معاشی غیر یقینی صورتحال، سرمایہ کاروں کے رجحان اور ڈالر کی قدر میں تبدیلی کی وجہ سے سونے کی قیمتوں میں اتار چڑھاؤ جاری ہے۔

یاد رہے کہ گزشتہ روز سونا 3,000 روپے سستا ہوا تھا، جب کہ اس سے ایک دن قبل یعنی منگل کو 1,500 روپے کا اضافہ دیکھا گیا تھا۔

عام صارفین اور جیولرز کے لیے یہ مسلسل بدلتی قیمتیں تشویش کا باعث بنی ہوئی ہیں، جبکہ سرمایہ کار سونے کو ایک محفوظ اثاثہ سمجھ کر اس کی طرف دوبارہ متوجہ ہو رہے ہیں۔