پنجاب میں ایکو ٹورازم نیٹ ورک کے قیام کا آغاز، سیاحت اور ورثے کی ترقی کیلئے تاریخ ساز منصوبہ

لاہور:وزیراعلیٰ پنجاب مریم نواز شریف کی ہدایت پر شمالی و جنوبی پنجاب میں عالمی معیار کے ایکو ٹورازم نیٹ ورک کی تعمیر کا آغاز کر دیا گیا ہے۔ مالی سال 2025-26 کے بجٹ میں سب سے زیادہ رقم سیاحت اور آثارِ قدیمہ کے منصوبوں کے لیے مختص کی گئی ہے، جس کا مقصد نہ صرف تاریخی ورثے کی بحالی بلکہ مقامی و غیر ملکی سیاحت کو فروغ دینا ہے۔

اس حوالے سے سینئر صوبائی وزیر مریم اورنگزیب کا کہنا ہے کہ مریم نواز پہلی وزیراعلیٰ ہیں جنہوں نے سیاحت اور ثقافتی ورثے کی حفاظت کو اپنی ترجیحات میں شامل کیا۔ ان کے مطابق "سیاحت کا فروغ نہ صرف ماحولیات میں بہتری لائے گا بلکہ بین الاقوامی سطح پر پنجاب کا مثبت امیج بھی اجاگر کرے گا۔"

منصوبے کے تحت شمالی اور جنوبی پنجاب کے مختلف اضلاع میں اہم ترقیاتی اقدامات کیے جا رہے ہیں:

    مری میں نئی چیئر لفٹ کی فزیبلٹی رپورٹ تیار کر لی گئی ہے، جب کہ کوٹلی ستیاں میں بھی چیئر لفٹ لگانے کا فیصلہ کر لیا گیا ہے۔

    راجن پور، لیہ، ڈی جی خان، جہلم، گجرات، مظفرگڑھ اور ساہیوال کو سیاحتی مراکز میں تبدیل کرنے کے منصوبوں پر تیزی سے پیش رفت جاری ہے۔

    ہڑپہ، ٹیکسلا اور بھیرہ جیسے قدیم تاریخی مقامات کو سیاحتی مراکز کے طور پر ترقی دینے کے لیے ابتدائی کام شروع ہو چکا ہے۔

    دریائے سندھ کے کنارے داﺅد خیل، میانوالی اور غازی گھاٹ میں عالمی معیار کی تفریح گاہوں کی تعمیر بھی منصوبے کا حصہ ہے۔

    وزیراعلیٰ پنجاب نے روہتاس، جہلم اور شیخوپورہ کے تاریخی قلعوں کی بحالی اور اپ گریڈیشن کا عمل جلد شروع کرنے کی ہدایت جاری کر دی ہے۔

صوبائی حکومت کا کہنا ہے کہ ان منصوبوں میں نجی شعبے کے اشتراک سے بین الاقوامی معیار کی سہولیات فراہم کی جائیں گی، تاکہ پنجاب کو سیاحت کے عالمی نقشے پر اجاگر کیا جا سکے۔