پاکستان نے ویسٹ انڈیز کو 13 رنز سے شکست دے کر تین میچوں کی ٹی 20 سیریز اپنے نام کر لی

لاڈرہل: امریکی ریاست فلوریڈا کے شہر لاڈرہل میں کھیلے گئے تین میچوں کی ٹی 20 سیریز کے فیصلہ کن میچ میں پاکستان نے ویسٹ انڈیز کو 13 رنز سے شکست دے کر سیریز میں برتری حاصل کر لی۔ کپتان سلمان علی آغا نے ٹاس جیت کر پہلے بیٹنگ کا فیصلہ کیا، جس کے بعد پاکستان نے صائم ایوب اور صاحبزادہ فرحان کی شاندار نصف سنچریوں کی بدولت مقررہ 20 اوورز میں 4 وکٹوں کے نقصان پر 189 رنز بنائے۔

صاحبزادہ فرحان نے 74 جبکہ صائم ایوب نے 66 رنز کی عمدہ اننگز کھیلی۔ حسن نواز 15 اور محمد حارث 2 رنز بنا کر آؤٹ ہوئے، جبکہ خوشدل شاہ اور فہیم اشرف ناٹ آؤٹ رہے۔ ویسٹ انڈیز کی طرف سے جیسن ہولڈر، روسٹن چیز اور شمار جوزف نے ایک ایک وکٹ حاصل کی۔

جواب میں ویسٹ انڈیز کی ٹیم مقررہ ہدف 190 رنز کے تعاقب میں 176 رنز ہی بنا سکی، جس کی وجہ سے انہیں 13 رنز سے شکست کا سامنا کرنا پڑا۔ ویسٹ انڈیز کے جیوئل اینڈریو 24، ردرفورڈ 51 اور الیک ایتھنزے 60 رنز بنا کر نمایاں رہے۔ کپتان شائے ہوپ 7 اور جیسن ہولڈر بغیر کوئی رن بنائے پویلین لوٹ گئے جبکہ روسٹن چیز 15 رنز بنا کر ریٹائرڈ ہرٹ ہوئے۔

پاکستانی بولرز حسن علی، محمد نواز، حارث رؤف، صائم ایوب اور سفیان مقیم نے ایک ایک وکٹ حاصل کرکے ویسٹ انڈیز کی بیٹنگ لائن کو موثر انداز میں روک رکھا۔ بہترین کارکردگی پر صاحبزادہ فرحان کو پلیئر آف دی میچ اور محمد نواز کو پلیئر آف دی سیریز کا اعزاز دیا گیا۔

پاکستان کی اس کامیابی سے ٹیم کا اعتماد بلند ہوگیا ہے اور اب وہ ٹرینیڈاڈ روانہ ہو رہی ہے جہاں جمعے سے تین ایک روزہ میچز کی سیریز کا آغاز ہوگا۔ پاکستانی ٹیم کی شاندار بلے بازی اور بولنگ نے شائقین میں ایشیا کپ میں بھی عمدہ کارکردگی کی امید پیدا کر دی ہے۔